كل أسئلتكم تجدونها هنا: (سأشرح باللغة العامية)
- التسجيل في دكتوراه 2021
يستحسن أن يكون بالحاسوب لتسهيل العملية ولأنه يتم طباعة بعض الوصولات والاستمارات في بعض الأحيان والأحسن تسجل وحدك لأن صحاب السيبار دايما يغلطو خاصة في اختيار التخصص والفرع والميدان (مكتوبين بدقة في أسفل الديبلوم كما في الصورة ) ركز معاي مليح تفهم كلش وماتغلطش.
أولا- لازم يكونو كوارطك واجدين مسكانيين في شكل pdf (كل ملف لوحده) وماش شرط الأصلية نسخة تصلح أصلية تصلح ولي ينجح يطلبو عليه الأصلية ضمن ملف ورقي والوثائق هي:
ملف التسجيل في الدكتوراه 2021
1- كشف نقاط البكالوريا (وليس شهادة البكالوريا) في ملف pdf لوحده
2- شهادة الليسانس في ملف pdf لوحدها
3- شهادة الماستر في ملف pdf لوحدها
4- كشوف نقاط الليسانس في ملف pdf لوحدها
5- كشوف نقاط الماستر في ملف pdf لوحدها
6- شهادة حسن السلوك في ملف pdf لوحدها (وهذه مختلف فيها وسيتم توضيحها لكن الأرجح أن تكون الخاصة بكل المسار الجامعي أو تدمج الخاصة بطور الليسانس والخاصة بطور الماستر في ملف واحد pdf) ولا يهم في شهادة حسن السلوك تكون جديدة ولا عندها 20 سنة لأنها تبقى دائما دليل موثق على أن سلوكك حسن أو العكس وماش راح يولي سلوكك سيء أو حسن بعدما كملت قرايتك.
7- الصورة: في السنوات الماضية كانت الصورة مطلوبة واجبارية هاد العام كي يفتح السيث تبان لأنهم محطوهاش ضمن الملف لي حطوه فالأرضية لي فتحت (الصورة تكون عادية كيما تاع بطاقة التعريف وتتسكانى image وليس pdf)
الأحسن هاد الوثائق تحطهم في دوسي في ديسك D ولا E وتسميهم بأسماءهم مثلا كشف نقاط البكالوريا، شهادة ليسانس.. باش كي ثيليشارجيهم علابالك وين تروح ومتغلطش في الملفات تحمل كل واحد في مكانو.
ثانيا - لازم يكون عندك ديجا حساب إيميل والأحسن يكون حساب gmail مفعل ومؤكد برقم الهاتف وتحفظ رقمه السري.
هذا الايميل تفتح بيه حساب جديد في موقع التسجيل بحيث تحط هاد الإيميل كاسم مستخدم وتديرلو كلمة سر جديدة وقبل ما تدير هادو كامل! (خطوة مهمة جدا ركز معاي)
افتح فال pc بالضغط على الزر الأيمن للفأرة ملف جديد اسمو
Nouveau Document text
واكتب فيه عنوان موقع التسجيل والايميل وكلمة السر الجديدة لي راح تفتح بيها واحفظ واغلق ( حطو في سطح المكتب bureau ومبعد افتحو ودير كوبي كولي لأي حاجة) ، علاه باش تسهل دخولك وخروجك لحسابك فالموقع وباش متنساش كلمة المرور واسم المستخدم لي فتحت بيهم وديما دير نسخ لصق وادخل (على كل حال القائمون على الأرضية انتبهو لهذه النقطة واستحدثو خطوة جديدة وهي طباعة الايميل وكلمة المرور لي سجلت بيهم) (كما يمكن حتى من الآن وقبل فتح الموقع يعني في ليتساع كتابة معظم المعلومات الخاصة بك كرقم تسجيل البكالوريا والاسم واللقب والعنوان والايميل وكلمة المرور الجديدة لي راح تستعملها وغيرها ومبعد دير كوبي /كولي باش ماتغلطش وباش ماتطولش فالتسجيل لأن الموقع أحيانا كي تطول فالتسجيل وتدير تأكيد وحفظ ميحفظش بسبب الأنترنت والضغط وغيرها مما يضطرك لتحديث الصفحة وإعادة ادخال البيانات)
خطوات التسجيل
الخطوة الأولى: عادة هي فتح حساب في الموقع من خلال ادخال رقم التسجيل في البكالوريا وسنة الحصول على البكالوريا والايميل في خانة اسم المستخدم 👤 وكلمة مرور جديدة ثم حفظ وطباعة الوصل (يحتوي كلمة المرور) ثم اكمال أو خروج وإعادة دخول باسم المستخدم وكلمة المرور التي فتحت بيها حساب قبل قليل.
الخطوة الثانية: ملأ المعلومات الشخصية (الاسم اللقب تاريخ الميلاد العنوان الهاتف..... ) ورفع الصورة ثم تأكيد وحفظ ومتابعة
الخطوة الثالثة: إدراج المعلومات الخاصة بنظامك (lmd/classique ) وبالتخصص والفرع والميدان والكلية والجامعة (تجدها على شهادة الماستر بدقة أسفل الدبلوم على اليسار كما في الصوره ) يعني كيما تلقاها فالديبلوم حطها ماش تشبه برك. عادة يتم إدراج الميدان والفرع والتخصص بالضغط على السهم جانب الخانة ثم الضغط على الاختيار المناسب المطابق لتخصصك وفرعك وميدانك وكليتك وجامعتك... وفي بعض التخصصات بالنسبة للكلاسيك اذا لم تجدها مدرجة أكتبها كتابة... ثم تأكيد وحفظ ومتابعة
الخطوة الرابعة: تحميل الملفات وخاصة التي تجد أمامها كلمة اجباري obligatoire عادة يحمل كل ملف بالضغط على الخانة المكتوب فيها اسم ذلك الملف مثلا relevé du bac
Relevés licence..
وبعد التحميل يظهر زمز الpdf أو Adobe reader مكان اسم الملف ويمكن التأكد من تحميل الملف بشكل صحيح بالضغط على ذلك الرمز فيحمل الملف من جديد من الموقع إلى حاسوبك على شكل pdf.
ثم تأكيد وحفظ ومتابعة
الخطوة الخامسة:
تخير التخصص والجامعة أو الجامعات لي تشارك فيها (حسب القرار والموقع لا ندري أجامعة أم أكثر)
وهنا يخرجولك الجامعات لي فتحو تخصصك حسب التخصص والفرع والميدان لي حطيتو فالخطوة الثالثة تعاود تكليكي على السهم في كل خانة وتخير الميدان والفرع يخرجولك الجامعات والتخصصات لي فتحوه تخير وتكليكي . اذا كان جامعات بزاف كلما تكمل جامعة وتديرلها حفظ دير جديد nouveau وزيد جامعة حتى تكمل 4 فالأخير يخرجلك جدول فيه 4 جامعات على شكل جدول رغبات.. ثم تأكيد وحفظ ومتابعة
الخطوة السادسة: تأكيد التسجيل وطباعة وصل التسجيل وقبل ذلك يحذرك الموقع أنك لا تستطيع تغيير المعلومات (ne peu pas modifier ) بعد هذه الخطوة لذا ما تديرش تأكيد التسجيل حتى تتأكد بلي جميع الخطوات والمعلومات صحيحة وكاملة.
قبل هذه العملية تقدر تنتقل من خطوة إلى خطوة بالضغط على رقم أي خطوة مثلا 4.. 5... 2... وتقدر تغير معلومات أي خطوة بالانتقال لتلك الخطوة ثم الضغط على (annuler la validation ) ثم تصحيح أي معلومة ثم تأكيد وحفظ ومتابعة
Valider.. Enregistrer et continuer
كي تأكد التسجيل وتطبع الوصل حافظ على الإيميل وكلمة المرور لأنك تحتاجهم باش تشوف النتائج لاحقا، وتطبع استدعاء المشاركة.
موقع الرسمي للتسجيل في الدكتوراه 2021
ملاحظة: بعد فتح حساب في الموقع ثم الخروج وإعادة الدخول يمكنك أن تتم خطوة او اثنين وتخرج وتدخل لاحقا.